Agar siz rasmiy ish joyiga ega bo’lmasangiz, homiladorlik yoki kasal bo’lganda sizga nafaqa puli beriladi. Buning uchun ijtimoiy ixtiyoriy sug’urta badallarini to’lab yurgan bo’lishingiz kerak. Bundan tashqari, qonunchilikda keltirilgan ayrim shartlarga to’g’ri kelishingiz ham kerak. Bu shartlar qanday ekani va badallarni to’lash tartibi haqida ushbu maqola orqali bilib olishingiz mumkin.  

2026-yildan boshlab O‘zbekistonda davlat ijtimoiy sug‘urtasining yangi tizimi joriy etildi. Bu fuqarolarni kasallik, homiladorlik, ishsizlik kabi og‘ir hayotiy vaziyatlarda daromadsiz qolib ketishdan himoyalaydi. Yangi tizim doirasida nafaqalar endilikda ish beruvchi hisobidan emas, balki Davlat ijtimoiy sug‘urta jamg‘armasi orqali to‘lanadi. Bu esa davlat va xususiy sektorda ishlovchi barcha fuqarolar uchun teng ijtimoiy kafolatlar yaratilishini anglatadi.

 

 3 xil turdagi sug‘urtadan foydalana olasiz

O‘zbekiston Respublikasi Prezidentining 2025-yil 3-noyabrdagi PF-206-son Farmoniga muvofiq, quyidagi nafaqalar Davlat ijtimoiy sug‘urta jamg‘armasi orqali to‘lanishi belgilanmoqda:

2026-yil 1-yanvardan homiladorlik va tug‘ish nafaqasi — ayollarning tug‘ruqqacha va tug‘ruqdan keyingi davri uchun to‘lanadi;

 2026-yil 1-iyuldan vaqtincha mehnatga layoqatsizlik nafaqasi — xodimlarning kasalligi sababli mehnatga layoqatsiz bo‘lgan davri uchun to‘lanadi;

2030-yildan ishdan bo‘shatish nafaqasi — xodim ishdan bo‘shatilganligi uchun to‘lanadi.

 

Kimlar vaqtincha mehnatga layoqatsizlik hamda homiladorlik va tug‘ish nafaqasini olish huquqiga ega?

1. Davlat ijtimoiy sug‘urtasi bilan majburiy asosda qamrab olingan, sug‘urta stajiga ega barcha shaxslar:

• ish beruvchi bilan rasmiy mehnat shartnomasi asosida ishlayotganlar;
• fuqarolik-huquqiy shartnoma (FHQ) asosida xizmat ko‘rsatayotgan (ish bajarayotgan) shaxslar;
• qonunchilikda belgilangan tartibda boshqa rasmiy faoliyat bilan band bo‘lganlar.

2. Davlat ijtimoiy sug‘urtasi bilan ixtiyoriy asosda sug‘urtalanadigan shaxslar:

• o‘zini o‘zi band qilgan shaxslar;
• dehqon xo‘jaligida band bo‘lgan shaxslar;
• shaxsiy tomorqa yer uchastkalarida band bo‘lgan shaxsiy tomorqa yer uchastkalarining egalari yoki ularning oila a’zolari;
• davlat organlari va boshqa tashkilotlar tomonidan chet davlatlarda tashkil etilgan tashkilotlarda ishlaydigan O‘zbekiston Respublikasi fuqarolari;
• chet elda yollanib ishlaydigan O‘zbekiston Respublikasi fuqarolari;
• O‘zbekiston Respublikasi hududida doimiy yashovchi hamda O‘zbekiston Respublikasi hududida daromad keltiradigan faoliyatni amalga oshiradigan chet el fuqarolari va fuqaroligi bo‘lmagan shaxslar;
• ishlamaydigan fuqarolar, ular uchun sug‘urta badali eri (xotini) tomonidan to‘langanda;
• yuridik shaxslarning muassislari (ishtirokchilari) sifatida daromadlar oladigan fuqarolar;
• yakka tartibdagi tadbirkorlar, shu jumladan “Hunarmand” uyushmasining a’zolari bo‘lgan hunarmandchilik faoliyati sub’ektlari;
• faoliyatni yuridik shaxs tashkil etmagan holda, oilaviy tadbirkorlik shaklida amalga oshiradigan oila a’zolari;
• dehqon xo‘jaligining boshlig‘i.

Sug’urta nafaqasi olish uchun minimal staj talablari qanday?

Homiladorlik va tug‘ish nafaqasi uchun kamida 10 oy sug‘urta staji (oxirgi 6 oy uzluksiz);

Vaqtincha mehnatga layoqatsizlik nafaqasi uchun kamida 6 oy sug‘urta staji talab etiladi.

 

Homiladorlik va tug‘ish nafaqasi hamda vaqtincha mehnatga layoqatsizlik nafaqasi uchun alohida badal to‘lanadimi?

Yo‘q, to‘langan sug‘urta badali ikkalasi uchun ham inobatga olinadi. Ya’ni siz bitta badal to’laysiz va u badal sizni ham homiladorlik va tug‘ish nafaqasi, ham vaqtincha mehnatga layoqatsizlik nafaqasini olish huquqini beradi.

Ixtiyoriy sug‘urtada minimal oylik badal — 63 550 so’mdan (MHTEK ning 5%) istalgancha ko’proq to’lash mumkin, yuqori chegara belgilanmagan.

1-iyundan ixtiyoriy ijtimoiy sug’urta badalini Baraka ilovasi orqali to’lashingiz mumkin. Pul toʻgʻridan-toʻgʻri sizning Baraka ijtimoiy kartangizga yoki bank kartangizga tushadi.

 

Homiladorlik va tug‘ish nafaqasi hamda vaqtincha mehnatga layoqatsizlik uchun to’lanadigan ixtiyoriy badal qancha muddat davomida to’lab boriladi?

Sug‘urta nafaqalari fuqarolarning sug‘urta stajidan kelib chiqib tayinlanadi. Ixtiyoriy sug‘urta badalini ko‘roq va doimiy, uzoq muddat to‘lagan fuqaroga sug‘urta stajiga mutanosib ravishda nafaqa ham ko‘proq tayinlanadi. Shu bilan birga ixtiyoriy asosda sug‘urtalangan shaxslarga homiladorlik  va tug‘ish nafaqasi mehnatga haq to‘lashning eng kam miqdorining besh baravaridan ortiq bo‘lmagan miqdorda tayinlanadi.

 

Agar fuqaro ixtiyoriy asosda sug’urta to’lagan bo’lsa, homiladorlik va tug’ish nafaqasi uchun hisoblanadigan nafaqa miqdori, vaqtincha mehnatga layoqatsizlik uchun to’lanadigan nafaqadan qanday farq qiladi?

Ixtiyoriy asosda sug‘urtalangan shaxslar uchun ikkala nafaqaning hisoblash metodikasi ta’til kunlari va o‘rtacha oylik ish haqidan kelib chiqib bir xil:

– homiladorlik va tug‘ish bo‘yicha nafaqa mehnatga haq to‘lashning eng kam miqdorining 5 baravarigacha to‘lanadi.

– vaqtincha mehnatga layoqatsizlik uchun nafaqa vaqtincha mehnatga layoqatsizlik varaqasida belgilangan ishdan ozod etilgan kunlardan (ta’til kunlari) kelib chiqib hisoblanadi, biroq bir kalendar yilda 182 kundan oshmaydi.

 

Rasmiy ish joyiga ega bo’lmagan qaysi toifalar kasal bo’lganda nafaqa olishi mumkin?

Agar ixtiyoriy sugʻurta badali ishlamaydigan eri (xotini) va yuridik shaxslarning muassislari (ishtirokchilari) sifatida daromadlar oladigan fuqarolar uchun to’langanda, ular sanatoriy va sog‘lomlashtirish muassasalarida yoki yasama a’zo (protez) qo‘ydirish uchun reabilitatsiya muassasalarida yotganda 2026-yil 1-iyuldan ularga ham nafaqa berilishi mumkin. 

Faqat quyidagi 2 ta holatda nafaqa olishlari mumkin:

Shifokor tavsiyasi bilan sanatoriy va sogʻlomlashtirish maskanlarida davolanganida;

Protez (yasama aʼzo) qoʻydirish uchun maxsus reabilitatsiya markazlariga yotganda.

 

Ixtiyoriy sug’urta badali to’lagan fuqaro kasal bo’lsa, qancha muddat davomida jamag’armadan pul olishi mumkin?

Ixtiyoriy asosda sug’urtalangan shaxs (ish beruvchisi yo’q bo’lsa), kasallikning dastlabki 5 kuni uchun haq to’lanmaydi — 6-kundan boshlab nafaqa beriladi.

Nafaqa kasal bo’lgan kunlar davomida to’lanadi — ya’ni qancha kunga kasallik varaqasi berilsa, shuncha kun uchun (birinchi 5 kunni hisobga olmagan holda) sug‘urta stajidan kelib chiqib:

• Sug‘urta staji 6 oydan 8 yilgacha bo‘lganda → o’rtacha ish haqining 60%
• Sug‘urta staji 8 yildan ortiq bo‘lganda o’rtacha ish haqining 80% miqdorida to‘lanadi.

 Ixtiyoriy sug‘urta badali to’lagan fuqaroga qancha miqdorda nafaqa beriladi?

Davlat ijtimoiy sug‘urtasi bilan ixtiyoriy asosda sug‘urtalangan shaxslar uchun ixtiyoriy tarzda har oyda to‘langan sug‘urta badallarini oylik ish haqiga aylantirgan holda hisoblanadi. Bunda ushbu kichik bandga muvofiq bir oylik ish haqi miqdori 2026 yil 1 yanvardan boshlab har oy to‘langan sug‘urta badali summasini, uni to‘lash davrida amalda bo‘lgan sug‘urta badali stavkasiga bo‘lish hamda olingan natijani 100 foizga ko‘paytirish yo‘li bilan aniqlanadi.

Misol: sug‘urtalangan shaxs o‘zini o‘zi band qilgan shaxs sifatida ixtiyoriy ravishda 2026 yil yanvar uchun Jamg‘armaga bir yuz ellik ming so‘m miqdorda sug‘urta badali to‘ladi. Ushbu fuqaroga nafaqa hisoblashda uning 2026 yil yanvar uchun 3 000 000 so‘m miqdorda ish haqi aniqlanadi:

Bir oylik ish haqi miqdori quyidagi tartibda aniqlanadi:

to‘langan sug‘urta badali (bir yuz ellik ming) ÷ sug‘urta badali stavkasi (2026 yil uchun sug‘urta badali stavkasi — 5 foiz) × 100%= 3 000 000 so‘m.

Aniqlangan bir oylik ish haqi miqdori nafaqa hisoblanayotgan sug‘urtalangan shaxsga o‘rtacha bir oylik ish haqi sifatida inobatga olinadi.

Baraka ilovasini yuklab olib va ixtiyoriy ijtimoiy sug’urta uchun badal to’lang. O’zingizni ijtimoiy himoyalang.

Ilovani yuklab olish.

 Homiladorlik va tug’ish nafaqasini olish tartibi va to’lov haqida bu yerda batafsil tanishishingiz mumkin.

 

Baraka mobil ilovasiga yangiliklar kiritdik. Ilovaga ijtimoiy xizmatlardan foydalanish jarayonini soddalashtirish hamda moliyaviy operatsiyalarni qulaylashtirishga qaratilgan qator yangi funksiyalar qo’shdik. 

Quyida ilovaga kiritilgan asosiy o‘zgarishlar va yangi imkoniyatlar bilan batafsil tanishishingiz mumkin:

Ijtimoiy xizmatlar va sug‘urta tizimidagi yangiliklar

Ixtiyoriy ijtimoiy sug‘urta badallari. Endilikda foydalanuvchilar ilova orqali nafaqat o‘zlari, balki boshqa shaxslar (oilalar va yaqinlari) uchun ham ixtiyoriy ijtimoiy sug‘urta badallarini masofadan turib to‘lashlari mumkin.

Imtiyozlar bo‘limining kengaytirilishi. Ilovaning imtiyozlar bo‘limi orqali Davlat ijtimoiy xizmatlaridan foydalanish yanada osonlashdi. Endi foydalanuvchilar quyidagi xizmatlar uchun to‘g‘ridan-to‘g‘ri ariza yuborish imkoniyatiga ega:

Ijtimoiy reyestrga kiritish va chiqarish;

Bolalar nafaqasini tayinlash.

Sun’iy intellekt asosidagi yordamchi. Foydalanuvchilarga ularning ehtiyojlariga mos keladigan ijtimoiy xizmatlarni aniqlash va qidirishda ko‘maklashuvchi sun’iy intellekt tizimi integratsiya qilindi.

Bank kartalari va pul o‘tkazmalari tizimidagi qulayliklar

Baraka kartalarini rasmiylashtirish. Baraka kartasini chiqarish (ochish) yoki uni qayta chiqarish uchun to‘lovlarni nafaqat mavjud Baraka kartalari, balki milliy to‘lov tizimining Uzcard va Humo bank kartalari orqali ham amalga oshirish funksiyasi joriy etildi.

Kartalar boshqaruvi va P2P o‘tkazmalar. Foydalanuvchilar o‘zlariga tegishli bo‘lgan bir nechta bank kartalarini ilovaga biriktirishlari, ular o‘rtasida o‘zaro (P2P) pul o‘tkazmalarini bajarishlari hamda Baraka kartalari balansini tezkor ravishda to‘ldirishlari mumkin.

Shaffoflik va xavfsizlik. Kartadan kartaga amalga oshirilgan pul o‘tkazmalari xavfsizligini ta’minlash hamda xatoliklarning oldini olish maqsadida, endilikda elektron cheklarda (kvitansiyalarda) jo‘natuvchi va qabul qiluvchining ismi-sharifi hamda tegishli ma’lumotlari to‘liq aks ettiriladi.

Baraka jamoasi ilova funksionalini doimiy ravishda takomillashtirish va foydalanuvchilar uchun xavfsiz hamda zamonaviy raqamli xizmatlarni taqdim etish ustida ishlashda davom etadi.

Yuqorida qayd etilgan barcha yangi imkoniyatlar va qulayliklardan foydalanish uchun mobil ilovani Google Play yoki App Store orqali yangilang. [Ilovani yuklab olish]

 

Toshkent shahridagi “O‘zekspomarkaz” milliy ko‘rgazmalar majmuasida ijtimoiy sohadagi yilning eng muhim voqealaridan biri — “Inson uchun – 2026” festivali bo‘lib o‘tdi. 12-13-may kunlari davom etgan ushbu nufuzli tadbir inklyuziv jamiyat qurish, zamonaviy ta’lim va aholi bandligini ta’minlash borasidagi eng ilg‘or yechimlarni bir nuqtada jamladi.

Festivalning eng ko‘p e’tibor markazida bo‘lgan loyihalaridan biri bu — Ijtimoiy himoya milliy agentligi huzuridagi “Baraka” ijtimoiy kartasi loyihasi bo‘ldi. Loyiha ofisi jamoasi tadbir davomida o‘z stendi bilan ishtirok etib, mamlakatimiz ijtimoiy tizimidagi tub islohotlarning raqamli qiyofasini namoyish etdi.

Loyiha menejeri Avaz Yusupov o‘z chiqishida “Baraka” loyihasining mazmun-mohiyati va strategik ahamiyatiga to‘xtaldi:

«Bizning asosiy maqsadimiz — davlat tomonidan ko‘rsatiladigan ijtimoiy xizmatlarni to‘liq raqamlashtirish orqali byurokratiyani kamaytirish va fuqarolarga shaffof, qulay xizmat ko‘rsatish tizimini yaratishdir. ‘Baraka’ nafaqat to‘lov vositasi, balki inson qadri uchun xizmat qiluvchi yaxlit ekotizimga aylanadi.»

Tadbir davomida o‘quv va operatsion jarayonlar bo‘yicha rahbar Asad Panjiyev tomonidan o‘tkazilgan amaliy ma’ruza ishtirokchilarda katta qiziqish uyg‘otdi. Mutaxassis “Baraka” mobil ilovasining texnik imkoniyatlarini batafsil tushuntirib berdi:

Yakunda tashkil etilgan «Savol-javob» sessiyasida ekspertlar fuqarolarni qiziqtirgan savollarga javob berishdi. Muhokamalarda “Baraka” loyihasining kelgusida hududlar bo‘ylab to‘liq joriy etilishi va yangi funksional imkoniyatlar bilan boyitilishi ta’kidlandi.

Festival “Baraka” loyihasi xalqqa yanada yaqinlashishi va ijtimoiy himoya tizimining zamonaviy, insonparvar qiyofasini shakllantirishda muhim poydevor bo‘lib xizmat qildi.

Endi kommunal xizmatlar, davlat bojlari yoki o‘quv markazlari uchun alohida ilovalar qidirishga vaqt sarflamang. Baraka mobil ilovasi orqali kundalik ehtiyojlaringizdan tortib, murakkab moliyaviy va yuridik xizmatlargacha bo‘lgan 100 dan ortiq to‘lov turlarini bir necha soniyada amalga oshiring. Barcha muhim xizmatlar endi bitta platformada jamlangan.

Kundalik ehtiyojlar va kommunal xizmatlarga to’lov

Barakada quyidagilarga oson to’lov qiling:

Elektr energiyasi, gaz, suv, issiqlik tizimi va chiqindi xizmatlari.

Mobil aloqa, yuqori tezlikdagi internet va raqamli TV.

Avtomobilingiz uchun yoqilg‘i quyish stansiyalarida (AYQS) tezkor to‘lovlar.

Ta’lim va kelajak sari qadam

Farzandlaringiz va o‘zingizning ta’limingiz uchun bog‘chalar va maktablar, universitet, o‘quv markazlari va kurslarga navbatlarsiz to’lov qiling.

Davlat va yuridik xizmatlar

Rasmiyatchilik endi murakkab emas:

Bojlar, davlat xizmatlari markazlari to‘lovlari va yuridik xizmatlar.

YHXB (GAI) jarimalarini ilovaning o‘zida tekshiring va to‘lang.

Salomatlik, sayohat va sport

Sizning va oilangizning maroqli hordig‘i uchun:

Tibbiy xizmatlar va klinika to‘lovlari.

Aviachiptalar, temir yo‘l chiptalari va sayohat xizmatlari.

Fitnes zallari va sport seksiyalari uchun obunalar.

Moliyaviy va onlayn xizmatlar

Chegarasiz imkoniyatlardan foydalaning:

Sug‘urta, kreditlarni so‘ndirish va boshqa moliyaviy xizmatlar.

Xorijiy xizmatlar, o‘yinlar va ko‘ngilochar onlayn resurslar.

Ezgu ishlarga o‘z hissangizni qo‘shish uchun ishonchli xayriya fondlari.

Nima uchun to‘lovlarni Baraka orqali amalga oshirish kerak?

1. Bog‘cha pulidan tortib, xalqaro xizmatlargacha — hammasi bitta ilovada.
2. QR-kod orqali savdo va xizmat ko‘rsatish nuqtalarida bir zumda hisob-kitob qiling.
3. Har bir sarflangan tiyiningiz hisobi va elektron cheklar doimo qo‘l ostingizda.
4. Davlat standartlari darajasidagi himoya va mablag‘laringiz daxlsizligi.

Baraka — bu qulaylik, tezlik va ishonch demakdir!

Hayotingizni osonlashtirishni bugundan boshlang. Baraka ilovasini yuklab oling va barcha to‘lovlarni bitta tugma orqali boshqaring.

Zamonaviy hayotni pul o‘tkazmalarisiz tasavvur qilib bo‘lmaydi. Farzandingizga talabalik puli yuborish, yaqinlaringizga moddiy ko‘mak berish yoki shunchaki kartadan kartaga pul o‘tkazish — bularning barchasi Baraka ilovasida bir necha soniya vaqt oladi.

Lekin siz pul o‘tkazmalarida komissiya tariflarini to‘g‘ri tanlash orqali pulingizni tejashingiz mumkinligini bilarmidingiz? Keling, Baraka ilovasidagi eng foydali tariflarni ko‘rib chiqamiz.

Baraka kartalariaro 0% komissiya

Baraka ijtimoiy kartalari nafaqat nafaqa olish, balki pul o‘tkazmalarini eng arzon, hatto bepul amalga oshirish uchun ham mo‘ljallangan. Quyida komissiyalar bilan tanishing:

0% — mutlaqo bepul

Agar siz bir bank doirasida bir Baraka kartasidan ikkinchisiga pul o‘tkazsangiz, xizmat haqi olinmaydi:

• Aloqa Baraka -> Aloqa Baraka = 0%
• Xalq banki Baraka -> Xalq banki Baraka = 0%

0.5% — imtiyozli tarif

Baraka kartangizdan boshqa bank kartalariga pul yuborsangiz, komissiya odatdagidan deyarli ikki baravar past bo‘ladi:

• Baraka kartasi -> Humo yoki Uzcard = 0.5%
• Baraka (Aloqa) -> Baraka (Xalq banki) = 0.5%

Baraka boshqalardan farq qiladi

Odatda kartadan kartaga pul o‘tkazish komissiyasi boshqa ilovalarda 1% gacha yetadi. Baraka kartasi bilan esa:

1. Bir xil bank ichida pul o‘tkazib, komissiyadan butkul qutulasiz.
2. Boshqa kartalarga yuborganda esa kamida 0.5% mablag‘ingizni tejab qolasiz.

Misol uchun: 1 000 000 so‘m o‘tkazsangiz, oddiy kartada 10 000 so‘m to‘lasangiz, Baraka kartasida bu bor-yo‘g‘i 5 000 so‘m bo‘ladi yoki mutlaqo bepul amalga oshiriladi.

Bankomatlardan naqd pul yechish

Shuni yodda tutingki, bankomatdan naqd pul yechishda komissiya miqdori Baraka emas, balki bankomatni o‘rnatgan bank tomonidan mustaqil belgilanadi.

Pulingizni tejash uchun Baraka kartangiz qaysi bankka tegishli bo‘lsa (masalan, Aloqabank, Xalq banki), imkon qadar o‘sha bankning o‘z bankomatlaridan foydalanishga harakat qiling. Bankomat ekranda pul berishdan oldin komissiya miqdorini ko‘rsatadi — har doim tranzaksiyani tasdiqlashdan avval ekranga e’tibor bering.

Nima uchun aynan Baraka ilovasi?

Pul o‘tkazmasi ko‘z ochib yumguncha manzilga yetib boradi. 

Har bir tranzaksiya davlat standartlari asosida himoyalangan. 

Yashirin komissiyalar yo‘q. Siz pul yuborishdan oldin qancha xizmat haqi olinishini aniq ko‘rib turasiz.

Agar sizda ijtimoiy nafaqa kartalari bo‘lsa, ulardan pul o‘tkazishda foydalanib, komissiyani 0.5% gacha tushirishingiz mumkin. Bu har bir o‘tkazmada salkam ikki baravar tejamkorlik deganidir! . Hoziroq Baraka mobil ilovasini yuklab oling va aqlli o‘tkazmalarni boshlang.

1-aprel kuni Toshkent shahridagi 365-maktab o‘quvchilariga sinov tariqasida Baraka ijtimoiy kartalari berildi. Endi ular Baraka ijtimoiy kartasidan bank va transport kartasi sifatida foydalanish (xuddi ATTO kartasi kabi) imkoniyati ega bo’ladilar.

Tadbirda Ijtimoiy himoya milliy agentligi, Maktabgacha va maktab ta’limi vazirligi, Baraka loyiha ofisi va Aloqabank vakillari ishtirok etdilar. 

Tadbir davomida ishtirokchilar kartaning afzalliklari va kundalik hayotda qo‘llanilishi haqida ma’lumot oldilar. Loyihaning maqsadi yoshlarni moliyaviy savodxonlikka o‘rgatish va ularni ijtimoiy qo‘llab-quvvatlash tizimlariga integratsiya qilishdir.

Ma’lumot uchun, 2024-yildan boshlab O‘zbekistonda yagona ijtimoiy karta tizimi ishga tushdi. Endi barcha ijtimoiy to‘lovlar va nafaqalar asta-sekin shu kartalarga o‘tkazilmoqda. Nafqaxo‘rlar uchun kartalarni chiqarish va yetkazib berish Xalq banki AJ’ga, talaba va maktab o‘quvchilari uchun xizmat ko‘rsatish va kartalarni taqdim etish esa Aloqabank AJga topshirilgan.

Shuningdek, Vazirlar Mahkamasining 2024 yil 28-dekabrdagi 897-sonli qaroriga binoan, ijtimoiy kartalar atigi 3 ish kunida chiqarilib, bank xodimlari tomonidan fuqarolarga yetkazib beriladi. Shu tarzda, har bir foydalanuvchi o‘z kartasini tez va qulay olishi mumkin.

 Baraka kartasining keng imkoniyatlair bilan bu yerda va Baraka ilovasining qulayliklari bilan bu yerda batafsil tanishishingiz mumkin. Ilovani hoziroq yuklab oling va kartangizni ulab, qulay foydalaning. 

E’lon

Hurmatli foydalanuvchilar, Baraka mobil ilovasida balans ko‘rinishi bilan bog‘liq yuzaga kelgan vaqtinchalik texnik nosozlik to‘liq bartaraf etildi. 

Hozirda ilova odatdagidek ishlamoqda va balanslaringiz to‘g‘ri ko‘rinishda aks etmoqda. Agar ilovangizda balans hali yangilanmagan bo‘lsa, ilovani qayta ochish yoki yangilashni tavsiya qilamiz.

Barcha mablag‘laringiz doimo xavfsiz saqlanadi.

Hurmatli foydalanuvchilar, ayni paytda Baraka mobil ilovasida ayrim foydalanuvchilarning balansida noto‘g‘ri summa yoki nol balans ko‘rinishi holatlari kuzatilmoqda. Xavotir olmang, bu kartangizda mablag‘ yo‘q degani emas. Kartangizda mablag’ bor va undan bankomat yoki savdo shahobchalarida foydalana olasiz. 

Ushbu nosozlik vaqtinchalik texnik sabablar tufayli yuzaga kelayotganini ma’lum qilamiz. Barcha mablag‘laringiz to‘liq xavfsiz saqlanmoqda.

Hozirda holatni bartaraf etish bo’yicha ishlayapmiz. 1-2 kunda jarayon yakunlangach, balansingiz to‘g‘ri ko‘rinishda avtomatik ravishda tiklanadi.

Foydalanuvchilarga tavsiyalar

• Kartangizdagi mablag‘ni xavotirlanmasdan ishlating — u bankomat va savdo nuqtalarida faol.

• Ilovadagi balans vaqtincha noto‘g‘ri ko‘rinayotgan bo‘lsa ham, mablag‘laringiz xavfsiz.

• Agar nosozlik davom etadigan bo‘lsa yoki boshqa savollar yuzaga kelsa, iltimos, Baraka qo‘llab-quvvatlash xizmatiga murojaat qiling.

Biz foydalanuvchilarimizga bizni tushunishgani va sabr uchun minnatdorchilik bildiramiz. Har bir mablag‘ingiz xavfsizligi biz uchun muhim ahamiyatga ega, va biz barcha nosozliklarni tezkorlik bilan bartaraf etishga harakat qilamiz.