Category: Daǵazalar

Hayotingizni yengillashtirish, davlat yordamini tez, xavfsiz va zamonaviy usulda olish imkonini beruvchi Baraka ijtimoiy kartasi haqida eshitganmisiz? Bu hukumat yo‘lga qo‘ygan “Ijtimoiy karta” tizimi bo‘lib, u barcha ijtimoiy imtiyoz va to‘lovlarni bitta raqamli, ishonchli va global kartaga jamlaydi.

Baraka — yangi avlod kartasi
“Baraka” — bu nafaqat ijtimoiy karta, balki zamonaviy dizaynga ega global Visa kartasidir. U orqali siz Visa tarmog‘idagi istalgan joyda to‘lov, online va offline savdolar qilishingiz mumkin. Va eng muhimi — ijtimoiy toifalar uchun u bepul taqdim etiladi.
Kartani tanib olishingiz oson: uning dizayni o‘ziga xos, zamonaviy va och yashil “Baraka” brendi ranglari bilan bezatilgan. Bizning maqsad – bu kartani ijtimoiy yordam va ishonch timsoliga aylantirish.

Bank kartasi shaklidagi Baraka ijtimoiy kartasida shaxsga oid qanday maʼlumotlar boʻladi?
Baraka ijtimoiy kartasi sizning shaxsingizni tasdiqlovchi bir nechta muhim maʼlumotlarni oʻz ichiga oladi. Bu maʼlumotlar kartaning old va orqa tomonida xavfsizlik choralariga rioya qilingan holda QR kodda joylashtiriladi.

Kartaning old tomonida:
Familiya, ism: Egasining familiyasi va ismi (oʻzbek yoki ingliz tillarida, maxsus belgilar va 20 harf chekloviga rioya qilingan holda).
Amal qilish muddati: Kartadan foydalanish mumkin boʻlgan muddat.

Kartaning orqa tomonida:
Orqa tomonda shaxsni chuqurroq identifikatsiyalash uchun qoʻshimcha, koʻproq texnik maʼlumotlar beriladi.
Raqamli fotosurat: Ijtimoiy karta egasining raqamli fotosurati.
Familiya, ism: Egasining familiyasi va ismi (kartada yana bir bor koʻrsatiladi).
Fuqarolik turi: Fuqaroligi (yoki xorijiy fuqaro, fuqaroligi boʻlmagan shaxs ekanligi).
Jismoniy shaxsning shaxsiy identifikatsiya raqami (JShShIR): Shaxsning noyob identifikatsiya raqami.
Orqa tomondagi QR kodda kodlangan maʼlumotlar:
Kartadagi QR-kod skanerlanganda shaxsga oid qoʻshimcha, batafsil maʼlumotlarni taqdim etadi:
Familiya, ism: (Oʻzbek yoki qoraqalpoq tillarida).
Jinsi: Shaxsning jinsi.
Millati: Shaxsning millati.
Tugʻilgan joyi: Shaxsning tugʻilgan joyi.
Ijtimoiy sugʻurta raqami: (Agar mavjud boʻlsa).
Ijtimoiy karta berilgan sanasi.
Jismoniy shaxsning shaxsiy identifikatsiya raqami (JShShIR).
Ariza beruvchi toʻgʻrisidagi boshqa maʼlumotlar.
Qoʻshimcha shaxsiy element:
Imzo: Karta egasi 16 yoshga toʻlganidan soʻng, kartada uning shaxsiy imzosi boʻlishi mumkin.
Shuningdek, chipda:
Karta chipiga ham egasi haqidagi maʼlumotlar kiritiladi.
16 yoshdan keyin chipda Elektron Raqamli Imzo (ERI) kaliti sertifikati saqlanishi mumkin.
Bu maʼlumotlar Ijtimoiy kartaning shaxsingizni tasdiqlovchi va barcha imtiyozlaringizni bogʻlovchi ishonchli vosita ekanligini anglatadi.

Baraka xalqaro Visa Flex tizimida ishlaydi
“Baraka” kartasi Visa Flex tarmog‘ida to‘liq ishlaydi, ya’ni siz undan nafaqat O‘zbekistonda, balki butun dunyoda foydalanishingiz mumkin. Online xaridlar, transport, dorixona yoki xalqaro to‘lovlar — barchasi bitta kartada.
Baraka ishonchli hamrohingizga aylanadi
Bu karta – davlat tomonidan ko‘rsatilayotgan g‘amxo‘rlikning raqamli timsoli. U sizning imtiyozlaringizni bir joyda jamlaydi, yordamni tezlashtiradi va hayotingizni soddalashtiradi.

O‘zbekistonda 2023-yilda Ijtimoiy himoya milliy agentligi tashkil qilindi. Agentlik ish boshlaganidan beri “Inson qadri uchun” tamoyili bo‘yicha ish yuritadi. Buning bir misoli Baraka kartasida ko‘rinadi. Loyiha “Inson qadri uchun” g‘oyasiga qaday xizmat qila oladi?

Baraka kartasi asosida O‘zbekiston Respublikasi Prezidentining “Aholini ijtimoiy qo‘llab-quvvatlashning yagona raqamli tizimini joriy etish chora-tadbirlari to‘g‘risida”gi va Vazirlar Mahkamasining “Ijtimoiy karta axborot tizimini joriy etish va uning faoliyatini tashkil etish chora-tadbirlari to‘g‘risida”gi qarorlari yotadi.
Bu huquqiy hujjatlar fuqarolarning ijtimoiy xizmatlardan ortiqcha harakat va xarajatlarsiz oson foydalanishlari uchun imkoniyat yaratdi. Bu yo‘lda Baraka loyihasi asosiy dastaklardan biriga aylandi.

“Inson qadri uchun” g‘oyasi amalda nimani anglatadi?
Ancha vaqtdan beri o‘zbekistonliklar o‘zlariga kerakli hujjatlarni olish uchun bir nechta idoralarga borishga majbur bo’lib kelishardi. Bu uzoq navbatlar va kutishlarsiz hal bo‘lmasdi. Bu jarayonda fuqarolar nafaqat vaqt yo‘qotishlari, balki asabiylashish va qo‘shimcha xarajatga ham duch kelishardi. Endi esa Baraka loyihasi orqali bu jarayonlar raqamlashtirilib, fuqarolarga qulay tizim yaratilyapti. Bu tizim – oddiy, shaffof va insonni qadrlaydigan.
“Inson qadri uchun” degani har bir insonning vaqti, sha’ni va ishonchini qadrlash demakdir. Bu davlat fuqarolarga bir tomonlama yordam jo‘natadigan emas, balki fuqarolarning o‘zi ham o‘z huquqlaridan foydalanishda faol ishtirokchiga aylanishidir.

Baraka — fuqarolar va davlat tizimlari o‘rtasidagi ko‘prik
Baraka — fuqarolarni davlat tizimlari bilan uzviy bog‘laydigan ko‘prik vazifasini bajaradi. Loyiha doirasida ijtimoiy karta, Baraka mobil ilovasi va yagona davlat tizimi ishga tushadi.
Baraka kartasi bu – Visa kartasi, bank kartasi, transport kartasi, talabalar guvohnomasi, nafaqa guvohnomasi, mehnat varaqasi va boshqa hujjatlar vazifasini bajaradi. Ya’ni u fuqarolarning davlat xizmatlariga kirishdagi raqamli kaliti hisoblanadi.

Baraka mobil ilovasi orqali fuqarolar o‘z nafaqalari yoki ijtimoiy yordamlarini ro‘yxatdan o‘tkazishi, kuzatishi va foydalanishi mumkin. Ilova yordamida to‘lovlar va P2P o‘tkazmalarni amalga oshirish, muhim hujjatlardan foydalanish va yuklab olish mumkin.
Yagona davlat tizimi – Ijtimoiy xizmatlar, banklar va xizmat ko‘rsatuvchi tashkilotlarni xavfsiz tarzda bog‘lab, ijtimoiy to‘lovlarni shaffof va adolatli tarqatilishini ta’minlaydi. Bu uch qism birgalikda Barakani oddiy moliyaviy mahsulot emas, balki fuqaro markazida bo‘lgan raqamli tizimga aylantiradi.
(Batafsil bu yerda o‘qishingiz mumkin).

Baraka’ning asosiy tamoyillari
Baraka kartasi tezlik, aniqlik, hamma uchun kirish imkoniyati borligi va xavfsizlik mezonlariga asoslandi.

• Tezlik — yordamlar odatdagidan tezroq yetkaziladi.
• Aniqlik — fuqarolar o‘z huquqlari va xizmatlar haqida aniq ma’lumot oladi.
• Kirish imkoniyati — barcha fuqarolar, xorijiy rezidentlar va fuqaroligi bo‘lmagan shaxslar ham Baraka’dan foydalana oladi.
• Xavfsizlik — mablag’laringiz firibgarlardan himoya qilinadi va xarajatlaringizni nazorat qila olasiz.

Fuqarolar Baraka’ga ishonadi, chunki…
Baraka — davlat tomonidan yaratilgan tizim bo‘lib, uning yagona maqsadi — yordamni odamlarga to‘g‘ridan-to‘g‘ri va shaffof tarzda yetkazishdir. Bu tizim fuqarolardan byurokratiyaga moslashishni talab qilmaydi, aksincha u fuqarolarning ehtiyojlariga moslashadi. Shu sababli Baraka shunchaki texnologiya emas. U O‘zbekistonning adolat va inklyuzivlikni muhim hisoblashini anglatadi. U ijtimoiy himoyaning zamonaviy, insoniy va hurmatli shaklda amalga oshishini ta’minlaydi.

Baraka kartasi yordamida endi siz ijtimoiy xizmatlardan tez, shaffof va qog‘ozlarsiz foydalanishingiz mumkin. Ijtimoiy karta quyidagi vazifalarni bajaradi:

• bank kartasi;
• transport kartasi, shu jumladan, imtiyozli transport kartasi;
• davlat ijtimoiy himoya yordamlarini olish huquqini tasdiqlovchi hujjat;
• ijtimoiy himoyaga muhtoj aholi toifasiga yoki guruhiga mansubligini tasdiqlovchi hujjat;
• tovarlar (ishlar, xizmatlar), dori vositalari va tibbiy xizmatlar uchun qo‘shilgan qiymat solig‘i summasini belgilangan tartibda qaytarish bank kartasi;
• protez-ortopediya moslamalari va reabilitatsiya qilishning texnik vositalarini xarid qilish uchun vaucher yoki ijtimoiy to‘lovlar hisobidan qonunchilik hujjatlarida belgilangan boshqa tovarlar (ishlar, xizmatlar);

Shuningdek, karta quyidagilar uchun hisob vositasi vazifasini bajaradi:

• tadbirkorlik sub’yektlari tomonidan taqdim etilgan chegirmalar, bonuslar va boshqa sodiqlik dasturlari bo‘yicha;
• kirish chiptasi operatsiyalari tizimi asosida imtiyozli, bepul yoki qisman haq to‘lash asosida tartibga solinadigan davlat ijtimoiy ob’yektlariga, konsertlar, ko‘ngilochar tomoshalar va boshqa tadbirlarga borish huquqini tasdiqlash:
• ijtimoiy himoya muassasalariga kirish va chiqish bo‘yicha.                                                                                     !Ijtimoiy karta qonunchilik hujjatlarida nazarda tutilgan boshqa funksiyalarni ham bajarishi mumkin.

Aziz foydalanuvchilar, agar karta olishni o‘ylayotgan bo‘lsangiz, buni juda oson hal qilishingiz mumkin. Qanday qilib deysizmi? “Baraka” kartasini olish uchun quyidagi soddalashtirilgan usullardan foydalanishingiz mumkin.

Eng oson va qulay yo‘l – mobil ilova. App Store yoki Google Play’dan Baraka ilovasini yuklab, shaxsiy maʼlumotlarni kiriting va ariza yuboring. Ilovadagi buyruqlarni ketma-ket bajarasiz, shaxsingizni tasdiqlovchi ma’lumotlaringizni kiritasiz va Baraka kartasiga ega bo‘lasiz. Kartaning jismoniy variantini 3 kun ichida Xalq banki va Aloqabankning o‘zingiz tanlagan filialidan olasiz.

Baraka ilovasini qanday yuklab olish mumkin?

1-bosqich — ilovani yuklab oling. Ilovani oʻrnatish uchun quyidagi usullardan birini tanlang:

• Baraka.gov.uz saytiga kirib, eng pastki qismidan App Store (iPhone) yoki Google Play (Android) ustiga bosing.
• Doʻkonlar orqali — App Store (iPhone) yoki Google Play (Android) da “Baraka” deb qidirib toping va yuklab oling.

2-bosqich. Roʻyxatdan oʻtish bir necha daqiqani oladi va quyidagi bosqichlardan iborat:

• Shaxsni tasdiqlash — pasport maʼlumotlari va telefon raqamingizni kiriting.
• Raqamni tasdiqlash — SMS orqali kelgan kodni kiriting.
• Yuzni skanerlash (selfi) — shaxsni aniqlash uchun yuzingizni telefon kamerasiga yaqinlashtiring.
• Parol va PIN — profil uchun kuchli parol va ilovaga tez kirish uchun 4 xonali PIN yarating. (Parol bu — profilingizni himoya qiladigan uzunroq va murakkabroq maxfiy kod. PIN esa — ilovaga tez va qulay kirish uchun moʻljallangan 4 xonali qisqa raqamli kod)

3-bosqichda karta avtomatik qoʻshiladi

• Roʻyxatdan muvaffaqiyatli oʻtganingizdan soʻng, sizga berilgan “Baraka” ijtimoiy kartasi ilovaga avtomatik ravishda qoʻshiladi. Qoʻshimcha amal bajarishingiz shart emas.
• Shuningdek, Baraka kartalariga arizani Xalq banki yoki Aloqabankga borib berishingiz mumkin. Buning uchun o‘zingiz yashayotgan joyga yaqin filialiga pasport bilan borishingiz kifoya.

Yana bir usul – “Inson” ijtimoiy xizmatlar markazlari. Har bir tumanda faoliyat yuritadigan bu markazlarga tashrif buyurib, kartaga ariza bering. Bu markazlarda siz:

• Ijtimoiy yordam, nafaqa yoki subsidiya oluvchi sifatida ro‘yxatdan o‘tishingiz,“Baraka” kartasi uchun ariza topshirishingiz, zarur hollarda konsultatsiya olishingiz mumkin.

Eslatma. Karta harakatga layoqati cheklangan fuqarolar uyiga bepul yetkazib beriladi. Buning uchun siz joylashgan hududdagi “Inson” markazlariga qo‘ng‘iroq qilishingiz mumkin. Ular esa sizga ijtimoiy xodim jo’natishadi. Ijtimoiy xodim kartangizni rasmiylashtirishda yordam beradi.

O‘zbekistonda Ijtimoiy himoya milliy agentligi(IHMA) tarkibida “Ijtimoiy karta” tizimi joriy etilyapti. Bu tizim orqali fuqarolar davlat ijtimoiy himoya xizmatlaridan foydalanishi qulaylashadi, barcha hujjatlar yagona raqamli platformaga jamlanadi va navbatlar yo‘qoladi. Xo‘sh, bu nima degani, ijtimoiy karta nima, u sizning hayotingizni qanday yaxshilaydi yoki qo‘shimcha yengilliklar beradi? 

Baraka ijtimoiy kartasi nima?

Ijtimoiy karta bu — bank kartangiz va shaxsingizni tasdiqlovchi hujjat bo‘lib, shuningdek, transport kartasi, nogironlikni belgilovchi hujjat, talaba guvohnomasi vazifalarini bajaradi. Uni pasport yoki ID kartangizga o’xshab o’zingiz bilan olib yursangiz va bir vaqtning o’zida karta bilan savdo ham qilishingiz mumkin. Bundan tashqari, karta shaxsning ijtimoiy himoyaga muhtoj bo‘lgan aholining bir yoki bir nechta toifalariga mansubligini ko‘rsatadi. Xuddi shu kartaga esa Baraka nomi berilgan, ya’ni Baraka kartasi O’zbekistonda yagona ijtimoiy karta hisoblanadi. Baraka kartasi Baraka mobil ilovasini o‘z ichiga oladi. Ijtimoiy karta Baraka mobil ilovasiga biriktiriladi va u orqali boshqariladi. 

Fuqarolarga qanday imtiyozlar beradi?

Baraka ijtimoiy kartasi orqali quyidagi davlat xizmatlari va imtiyozlaridan foydalanish mumkin:
–  jamoat transportida imtiyozli tariflarni ishlatish;
– tibbiy xizmatlar, dorilar, protez ortopediya vositalari uchun mablag‘ olish;
– ijtimoiy yordam, subsidiyalar va boshqa to‘lovlar avtomatik tarzda karta hisobiga o‘tkaziladi;
– to‘lov yoki imtiyoz olish paytida karta maxsus terminalga (POS yoki raqamli tizim) ulanadi va tranzaksiya amalga oshiriladi.

Baraka ilovasi haqida

Fuqarolar Baraka mobil ilovasi orqali turli to‘lovlarni amalga oshirishlari, o‘z imtiyozlarini aniqlash va uni qo‘llay olishlari, turli xizmatlardan foydalanishlari mumkin. Bundan tashqari, ilovada raqamli hujjatlar bo’limi ham bor. U yerda shaxsga oid 17 turdagi hujjat saqlanadi. Shaxsni tasdiqlovchi hujjatdan tortib, guvohnomalar va ta’lim diplomlarigacha ilovadan topishingiz mumkin.
Ilovada saqlanadigan 17 turdagi raqamli hujjatlar to’liq ro’yxati bilan bu yerda tanishishingiz mumkin.

Baraka ijtimoiy kartasi kimlarga bepul beriladi?

Sizda Baraka ijtimoiy kartasi uchun haq to’laymanmi yoki bepul ham olsam bo’ladimi degan savol paydo bo’lishi tabiiy. Kartaning narxi 40 ming so’m. Biroq kartani pul to’lamay ham olish mumkin. Faqat buning uchun siz qonunchilik hujjatlarida tasdiqlangan 15 toifadagi shaxslardan biri bo’lishingiz kerak. Qolgan hollarda bank tomonidan belgilangan miqdorni to’lagandan so’ng karta olasiz.
Baraka ijtimoiy kartasi bepul muomalaga chiqariladigan va foydalanish uchun taqdim etiladigan shaxslar toifasi to’liq ro’yxati bilan bu yerda tanishishingiz mumkin.

Baraka kartasini Baraka ilovasi orqali osongina olish mumkin

Baraka kartasini olish uchun arizani Baraka mobil ilovasi orqali jo‘natishingiz mumkin. Bu eng tez va oson yo‘llardan biri. Chunki bunda ishingiz oson bitadi. Ilovani App store yoki Google Play Store orqali yuklab olasiz, ilovadagi buyruqlarni ketma-ket bajarasiz, shaxsingizni tasdiqlovchi ma’lumotlaringizni kiritasiz va Baraka kartasiga ega bo‘lasiz. Bundan tashqari, kartaga “Inson” ijtimoiy xizmatlar markazi, Xalq banki yoki Aloqabank orqali ham buyurtma berishingiz mumkin.
Ariza tasdiqlangach, kartani Xalq banki yoki Aloqabankdan olishingiz mumkin. Kartani jismoniy shaklda ham, elektron ko‘rinishda ham ishlatish mumkin. Harakatga layoqatsiz kishilar uchun karta uyga yetkazib beriladi.

Ishonch telefoniga qo‘ng‘riroq qiling

Ijtimoiy kartani olish va foydalanish masalalari boʻyicha IHMAning “1070” qisqa raqamli telefoni faoliyati yoʻlga qoʻyilgan. Qo’shimcha ma’lumot olish uchun shu raqamga qo’ng’iroq qilishingiz mumkin.

Baraka loyihasi sizning xavfsizligingiz uchun qayg‘uradi

Davlat organlari kartaning ishlatilishini real vaqt rejimida kuzatadi. Fuqarolar masofadan turib ham xizmatlarga murojaat qilishi va mablag‘ni qabul qilishi mumkin.
Kartaning xavfsizlik va maxfiyligi ta’minlangan. Har bir karta noyob raqam bilan himoyalangan. Faqat ro‘yxatdan o‘tgan xizmatlar va imtiyozlar karta orqali olinadi, boshqa ma’lumotlar bazaga kiritilmaydi.
Qisqacha aytganda: ijtimoiy karta bu – sizning barcha ijtimoiy imtiyozlaringizni jamlovchi, ularni elektron tarzda boshqarish va xizmatlarni masofadan yoki terminal orqali olish imkonini beruvchi raqamli vosita.

Muhim! Baraka tizimi xizmatlaridan barcha fuqarolar, xorijiy rezidentlar va fuqaroligi bo‘lmagan shaxslar ham foydalanishi mumkin. Jarayonlar IHMA tomonidan nazorat qilinadi va shaffoflik ta’minlanadi.