OMMAVIY OFERTA
to‘lov xizmatlarini ko‘rsatish uchun
Ushbu ommaviy oferta (bundan keyin «Oferta» va/yoki «Shartnoma» deb yuritiladi) O‘zbekiston Respublikasi Markaziy bankining 2024-yil 28-dekabrdagi 62-sonli litsenziyasiga ega bo‘lgan «OXUS PAY» aksiyadorlik jamiyatining (bundan keyin «OXUS PAY» yoki «Operator» deb yuritiladi) BARAKA savdo belgisi ostida to‘lov xizmatlarini ko‘rsatish to‘g‘risida shartnoma (bundan keyin «Xizmat») tuzish haqidagi rasmiy ommaviy taklifini ifodalaydi.
Foydalanuvchining ushbu Ofertada nazarda tutilgan harakatlarni amalga oshirishi uning barcha shartlarini to‘liq va so‘zsiz qabul qilganligini anglatadi (bundan keyin «Oferta aksepti» deb yuritiladi). Oferta qabul qilingan paytdan boshlab shartnoma yozma hujjatning yuridik kuchiga ega bo‘lgan elektron shaklda tuzilgan hisoblanadi.
Ushbu Shartnoma bilan tartibga solinmagan qismida Tomonlar O‘zbekiston Respublikasining amaldagi qonunchiligiga amal qiladilar.
- OFERTADA QO‘LLANILADIGAN ATAMALAR VA TA’RIFLAR
Xizmat — Foydalanuvchiga Yetkazib beruvchilar foydasiga xizmatlar uchun to‘lovlarni amalga oshirish, bir bank kartasidan boshqasiga pul o‘tkazmalarini amalga oshirish, shuningdek, Xizmatning funksional imkoniyatlari doirasida boshqa harakatlarni amalga oshirish imkonini beruvchi dasturiy mahsulot va to‘lov vositasidir.
Foydalanuvchi — muomalaga layoqatli jismoniy shaxs, mustaqil ravishda yoki o‘zining qonuniy vakili orqali (muomala layoqati cheklangan taqdirda) bank kartasidagi pul mablag‘larini tasarruf etadi, ushbu Ofertani qabul qiladi va shu sababli Xizmat foydalanuvchisi hisoblanadi.
Bank kartasi — emitent tomonidan chiqarilgan, egasiga bank hisobvarag‘i bo‘yicha onlayn rejimida yoki elektron terminallar orqali to‘lov operatsiyalarini amalga oshirish, shuningdek, naqd pul mablag‘larini olish yoki valyuta ayirboshlash imkoniyatini beruvchi to‘lov kartasi (debet, kredit, virtual).
O‘tkazma — Xizmat foydalanuvchisining topshirig‘i asosida bank hisobvaraqlari o‘rtasida amalga oshiriladigan naqd pulsiz pul o‘tkazmasi.
To‘lov operatsiyasi — Foydalanuvchi tomonidan Xizmat orqali amalga oshiriladigan Yetkazib beruvchilar xizmatlari uchun to‘lov operatsiyasi bo‘lib, uning natijasida pul mablag‘lari Foydalanuvchining bank kartasidan yechib olinadi. To‘lovlar faqat nomlari Servisning tegishli menyusida ko‘rsatilgan Yetkazib beruvchilar foydasiga amalga oshirilishi mumkin.
Yetkazib beruvchi — tegishli shartnoma asosida abonent/mijoz/xaridorga realizatsiya qilinadigan, ko‘rsatiladigan xizmatlar, tovarlar, ishlarni realizatsiya qiluvchi yuridik shaxs.
Identifikatsiya — Foydalanuvchi tomonidan taqdim etilgan shaxsiy ma’lumotlarni tahlil qilish va tekshirish orqali uning shaxsini aniqlash bo‘yicha chora-tadbirlar majmui bo‘lib, bunda Servisning funksional imkoniyatlari va O‘zbekiston Respublikasining amaldagi qonunchiligida nazarda tutilgan dasturiy-texnik va tashkiliy-huquqiy mexanizmlardan foydalaniladi. Identifikatsiya shaxsiy ma’lumotlarni kiritish, shaxsni tasdiqlovchi hujjatlarni yuklash, shuningdek, Servisning muayyan Xizmatlariga kirishni ta’minlash va tegishli operatsiyalarni amalga oshirish uchun zarur bo‘lgan boshqa autentifikatsiya usullarini qo‘llash orqali amalga oshiriladi.
- AKSEPT TARTIBI
2.1. Ushbu ommaviy Ofertaning aksepti sifatida Servis funksiyasidan foydalanish va ushbu Servis orqali To‘lov operatsiyalarini amalga oshirish fakti tan olinadi.
2.2. Ro‘yxatdan o‘tish jarayonida Foydalanuvchi ro‘yxatdan o‘tish kodini o‘z ichiga olgan SMS-xabarni olish uchun o‘zining mobil telefon raqamini ko‘rsatadi. Ko‘rsatilgan SMS-xabar «OXUS PAY» AJga yuboriladi. Tegishli maydonga ro‘yxatga olish kodini kiritish ro‘yxatga olish jarayonini yakunlashning majburiy sharti hisoblanadi.
2.3. Foydalanuvchi ushbu ommaviy Oferta shartlariga rozi bo‘lmagan taqdirda, u darhol xizmatdan foydalanishni to‘xtatishi va ushbu Ofertani qabul qilishga qaratilgan har qanday harakatlarni amalga oshirishdan o‘zini tiyishi shart.
2.4. Oferta akseptini amalga oshirish orqali Foydalanuvchi Shartnoma shartlariga to‘liq va so‘zsiz roziligini tasdiqlaydi hamda ularni lozim darajada bajarish majburiyatini oladi.
- OFFERTA PREDMETI
3.1. Operator Foydalanuvchiga to‘lovlar va pul o‘tkazmalarini amalga oshirish, xizmatga bog‘langan Kartalar balansi haqidagi ma’lumotlarni onlayn rejimda ko‘rish imkoniyatini taqdim etadi.
3.2. Xizmatdan foydalanish orqali Foydalanuvchiga quyidagi harakatlarni amalga oshirish imkoniyati beriladi:
— yetkazib beruvchilarning tovarlari, ishlari va xizmatlari uchun to‘lovni onlayn tarzda amalga oshirish;
— bank kartalarini boshqarish, jumladan ularni qo‘shish va o‘chirish;
— onlayn rejimda bir bank kartasidan boshqasiga pul o‘tkazmalarini amalga oshirish;
— xizmatning funksionalligida amalga oshirilgan boshqa funksiyalardan foydalanish.
3.3. Servis pullik asosda taqdim etiladigan alohida xizmatlarni o‘z ichiga olishi mumkin. Bunday xizmatlarni faollashtirish Foydalanuvchi tomonidan mustaqil ravishda, xizmat tavsifi, uning narxi va foydalanish shartlarini o‘z ichiga olgan tegishli ommaviy oferta bilan oldindan tanishib chiqish sharti bilan amalga oshiriladi.
3.4. Ushbu Ofertani qabul qilish orqali Foydalanuvchi «OXUS PAY» AJga o‘zining shaxsiy ma’lumotlarini O‘zbekiston Respublikasining «Shaxsga doir ma’lumotlar to‘g‘risida»gi qonunchiligiga muvofiq qayta ishlashga muddatsiz rozilik beradi. Bunday rozilik, xususan, to‘lovlar to‘g‘risidagi ma’lumotlarni, mobil telefon raqamini, bank kartalari rekvizitlarini, familiyasi, ismi va otasining ismini, tug‘ilgan sanasi va joyini, pasport ma’lumotlarini (ID-karta), identifikatsiya ma’lumotlarini (shu jumladan STIR, JSHSHIR), ro‘yxatdan o‘tkazish ma’lumotlarini, shuningdek, Servisning ishlashi va daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasidagi qonunchilik talablarini bajarish uchun zarur bo‘lgan boshqa shaxsiy ma’lumotlarni qayta ishlashga tatbiq etiladi. Foydalanuvchi, shuningdek, ushbu Shartnomani bajarish va Xizmatning ishlashini ta’minlash maqsadida o‘zining shaxsiy ma’lumotlarini uchinchi shaxslarga – Operatorning hamkorlariga transchegaraviy uzatish, tarqatish va taqdim etishga roziligini bildiradi, bunda bunday shaxslar maxfiylik va shaxsiy ma’lumotlar to‘g‘risidagi qonunchilik normalariga rioya qilishlari shart.
3.5. Operator tomonidan ko‘rsatiladigan xizmatlar pullik hisoblanadi. Foydalanuvchi ushbu Shartnomada nazarda tutilgan miqdorda va tartibda haq to‘lash majburiyatini oladi.
3.6. To‘lovlar va o‘tkazmalarni amalga oshirishda Operator Foydalanuvchi, bank kartasi emitenti va Yetkazib beruvchilar o‘rtasida faqat texnik va axborot hamkorligini ta’minlaydi. Hisobdan chiqarish, hisobga olish va tegishli moliyaviy operatsiyalarni amalga oshirish uchun to‘liq javobgarlik Foydalanuvchining bank kartasini chiqargan bankka yoki ekvayerga yuklatiladi.
3.7. Foydalanuvchi, agar amaldagi qonunchilikda boshqacha qoida nazarda tutilmagan bo‘lsa, pul mablag‘lari hisobdan chiqarilgan paytdan keyin Xizmat orqali amalga oshirilgan xato to‘lovlarni bekor qilish majburiyatini Operator zimmasiga olmasligi haqida xabardor qilingan.
Bunday holda, Foydalanuvchi kartasini chiqargan bank ushbu bankning tegishli ofertasi/shartnomasida belgilangan shartlar va tartibga muvofiq javobgar bo‘ladi.
- SERVIS DOIRASIDA PULLI XIZMATLAR KO‘RSATISH XUSUSIYATLARI
4.1. Foydalanuvchiga tegishli mukofot nazarda tutilgan Yetkazib beruvchilar xizmatlari uchun to‘lovlarni amalga oshirish imkoniyati berilganda, bunday mukofot tegishli To‘lov bo‘yicha Yetkazib beruvchi foydasiga to‘lanishi kerak bo‘lgan summadan tashqari, tegishli Xizmat interfeysida ko‘rsatilgan miqdor va tartibda ushlab qolinadi.
4.1.1. Yetkazib beruvchining tegishli haq to‘lanishi ko‘zda tutilgan Xizmatlari uchun To‘lovni Servis doirasida mavjud bo‘lgan istalgan Interfeys orqali amalga oshirilganligini tasdiqlash Foydalanuvchi tomonidan O‘zbekiston Respublikasi Fuqarolik kodeksining 370-moddasi ma’nosida ushbu Oferta shartlarining to‘liq va so‘zsiz aksepti hisoblanadi.
4.1.2. Foydalanuvchining kartasida mukofotni hisobga olgan holda To‘lovni amalga oshirish uchun mablag‘lar yetarli bo‘lmagan taqdirda, bunday To‘lov amalga oshirilmaydi.
4.1.3. Agar Yetkazib beruvchi o‘z Xizmatlari uchun To‘lovni lozim darajada ko‘rsatilmaganligi sababli yoki Yetkazib beruvchi tomonidan belgilangan boshqa asoslarga ko‘ra qaytarish imkoniyatini nazarda tutsa, ushbu Ofertaning 4.1-bandiga muvofiq mukofot sifatida hisobdan chiqarilgan pul mablag‘lari summasi qaytarilmaydi.
4.2. Foydalanuvchiga tegishli to‘lov nazarda tutilgan Operator xizmatlarini ko‘rsatishda, bunday to‘lov Foydalanuvchidan Foydalanuvchi tomonidan bog‘langan Kartadan Operator foydasiga Servisning tegishli interfeysida belgilangan miqdorlarda mablag‘larni hisobdan chiqarish orqali undiriladi.
4.2.1. Foydalanuvchining Operator xizmatlari uchun to‘lovni amalga oshirganligini tasdiqlashi yoki Xizmatning funksional qismida to‘lov undiriladigan tegishli xizmatlarning faollashtirilganligini tasdiqlovchi boshqa harakati O‘zbekiston Respublikasi Fuqarolik kodeksining 370-moddasi ma’nosida ushbu Oferta shartlarining to‘liq va so‘zsiz aksepti hisoblanadi.
4.2.2. Operator xizmatlarini to‘lash uchun Foydalanuvchining bank kartasida pul mablag‘lari yetarli bo‘lmagan taqdirda, pul mablag‘larini hisobdan chiqarish Xizmat interfeysiga qo‘shilgan Foydalanuvchining istalgan mavjud kartasidan zarur miqdor doirasida amalga oshirilishi mumkin.
4.2.3. Ushbu Ofertaning 4.2-bandida nazarda tutilgan tartibda hisobdan chiqarishni amalga oshirish uchun mablag‘lar yetarli bo‘lmagan taqdirda, Operatorning tegishli xizmatini ko‘rsatish Foydalanuvchi uchun to‘xtatiladi.
- TOMONLARNING HUQUQ VA MAJBURIYATLARI
5.1. OPERATOR QUYIDAGI HUQUQLARGA EGA
5.1.1. Ushbu Ofertaning yangilangan tahririni Operatorning rasmiy veb-saytida joylashtirish orqali uning shartlarini bir tomonlama o‘zgartirish. Foydalanuvchini bunday o‘zgarishlar haqida xabardor qilish push-bildirishnomalar, elektron xabarlar yoki xabardor qilishning boshqa mavjud usullari orqali yuborilishi mumkin.
5.1.2. Ushbu Shartnoma bo‘yicha huquq va majburiyatlarni uni bajarish maqsadida Foydalanuvchi bilan qo‘shimcha kelishuvsiz uchinchi shaxslarga o‘tkazish, agar bunday o‘tkazish Foydalanuvchining ahvolini yomonlashtirmasa va O‘zbekiston Respublikasining shaxsiy ma’lumotlar to‘g‘risidagi qonunchiligiga zid kelmasa.
5.1.3. Foydalanuvchiga ma’lumotlari Servisda va Operatorning rasmiy veb-saytida joylashtirilgan pullik va bepul xizmatlarni taqdim etish.
5.1.4. Texnik yoki yuridik asoslarga ko‘ra (shu jumladan sud qarorlari, huquqni muhofaza qiluvchi organlarning so‘rovlari), shuningdek, Foydalanuvchi tomonidan Shartnoma shartlari buzilganligi haqida shubha tug‘ilganda, aniqlangan holatlar bartaraf etilgunga qadar Foydalanuvchining Servisga kirishini cheklash yoki vaqtincha bloklash.
5.1.5. Xizmatdan foydalanish haqidagi statistik ma’lumotlarni to‘plash, qayta ishlash va saqlash, shuningdek, xizmatlar sifatini oshirish va foydalanuvchi tajribasini yaxshilashga qaratilgan so‘rovlar, anketalar va boshqa tadbirlarni o‘tkazish.
5.1.6. Foydalanuvchi Shartnoma shartlarini, O‘zbekiston Respublikasi qonunchiligi normalarini (jumladan, jinoiy daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishga qarshi kurashish to‘g‘risidagi normalarni) buzgan yoki firibgarlik alomatlari mavjud bo‘lgan taqdirda, Foydalanuvchining Servisdan foydalanishini vaqtincha cheklash yoki Shartnomani bir tomonlama bekor qilish, Foydalanuvchini mavjud aloqalar orqali yoki qonunchilikda nazarda tutilgan boshqa usul bilan xabardor qilish.
5.1.7. Operator Foydalanuvchi tomonidan firibgarlik operatsiyalariga shubha tug‘ilganda, shuningdek, O‘zbekiston Respublikasi qonunchiligida nazarda tutilgan boshqa hollarda, vaziyat aniqlangunga qadar bir tomonlama tartibda Xizmatdan foydalanishni vaqtincha bloklash yoki Shartnomani istalgan vaqtda bekor qilish huquqiga ega.
5.1.8. Marketing aksiyalari va sodiqlik dasturlarini o‘tkazish, Foydalanuvchiga ularda ishtirok etish bo‘yicha takliflar yuborish, shuningdek, Foydalanuvchining roziligi bilan reklama-axborot materiallaridan, shu jumladan maqsadli xabarnomalardan foydalanish.
5.1.9. Foydalanuvchini uning hisobi yoki operatsiyalari bilan bog‘liq firibgarlik alomatlari aniqlanganligi haqida xabardor qilish.
5.2. FOYDALANUVCHI QUYIDAGI HUQUQLARGA EGA:
5.2.1. Shartnoma shartlari va O‘zbekiston Respublikasi qonunchiligi doirasida Servisning barcha funksiyalaridan foydalanish.
5.2.2. Oferta qabul qilingunga qadar yoki pullik xizmatlar faollashtirilgunga qadar tariflar, xizmatlar va Xizmatdan foydalanish shartlari haqida ma’lumot olish.
5.2.3. Operatorga Call-markaz va boshqa aloqa kanallari orqali maslahat va texnik yordam so‘rab murojaat qilish.
5.2.4. O‘zbekiston Respublikasi qonunchiligida belgilangan tartibda shaxsiy ma’lumotlarni qayta ishlashga bergan roziligini qaytarib olish.
5.3. OPERATOR:
5.3.1. Ushbu Shartnoma shartlarini lozim darajada bajarish.
5.3.2. Agar imkoniyat bo‘lsa, Foydalanuvchi oldindan xabardor qilinadigan profilaktika va texnik ishlar davridan tashqari, Xizmatning ishlashini ta’minlash.
5.3.3. O‘zbekiston Respublikasi qonunchiligiga muvofiq Foydalanuvchining shaxsiy ma’lumotlari va bank siri maxfiyligini ta’minlash.
5.3.4. Ish vaqtida Call-markaz va boshqa aloqa kanallari orqali axborot yordamini ko‘rsatish.
5.3.5. Yangi Yetkazib beruvchilar va xizmat ko‘rsatish shartlaridagi o‘zgarishlar haqidagi ma’lumotlarni o‘z ichiga olgan muhim voqealar haqida push-bildirishnomalarni e’lon qilish.
5.3.6. Operatsion xatarlarni kamaytirish va taqdim etilayotgan to‘lov xizmatlari xavfsizligini ta’minlash choralarini ko‘rish, shu jumladan firibgarlikka qarshi kurashish maqsadida ko‘p omilli autentifikatsiyani, himoyalangan aloqa kanallarini qo‘llash.
5.4. FOYDALANUVCHI:
5.4.1. Agar Operator yoki qonunchilikda boshqacha tartib nazarda tutilgan bo‘lmasa, Servisdan faqat shaxsiy maqsadlarda foydalanish va uni tadbirkorlik faoliyatida qo‘llamaslik.
5.4.2. Hisobga kirish uchun foydalaniladigan login, parol va boshqa ma’lumotlarning maxfiyligini ta’minlash, shuningdek, hisob bilan bog‘langan telefon raqamini nazorat qilish.
5.4.3. Foydalanuvchining aybli harakatlari tufayli Operatorga va (yoki) uchinchi shaxslarga yetkazilgan zararlar va maxfiy ma’lumotlarning oshkor etilishi uchun javobgarlikni o‘z zimmasiga olish.
5.4.4. Push-bildirishnomalarni, Servisdagi va Operatorning rasmiy veb-saytidagi ma’lumotlarni kuzatib borish, ulardagi ko‘rsatmalarni o‘z vaqtida bajarish.
5.4.5. Shaxsiy ma’lumotlar va hisobga kirish rekvizitlarini uchinchi shaxslarga bermaslik.
5.4.6. Operatorga akkauntga ruxsatsiz kirish yoki undan noqonuniy foydalanish shubhalari, shuningdek, akkauntga biriktirilgan telefon raqami ustidan nazoratni yo‘qotish haqida darhol xabar berish.
5.4.7. Servis orqali noqonuniy moliyaviy operatsiyalarni, jumladan jinoiy daromadlarni legallashtirish, terrorizmni moliyalashtirish va boshqa noqonuniy harakatlarni amalga oshirmaslik.
5.4.8. Foydalanuvchi tomonidan Xizmat ishida zaifliklar, xatolar, nosozliklar yoki boshqa texnik kamchiliklar (jumladan, dasturiy xatolar) aniqlangan taqdirda, Foydalanuvchi bu haqda Operatorni darhol har qanday mavjud usul bilan xabardor qilish va bunday zaifliklar, xatolar yoki nosozliklardan, shu jumladan noqonuniy foyda olish yoki Operatorga, boshqa Foydalanuvchilarga yoki uchinchi shaxslarga zarar yetkazish maqsadida foydalanish, tarqatish yoki boshqacha tarzda suiiste’mol qilishdan tiyilish majburiyatini oladi.
5.4.9. Operator tomonidan yuboriladigan barcha xabarlar, bildirishnomalar, SMS va PUSH-xabarlarni diqqat bilan o‘rganib chiqish (Foydalanuvchi firibgarlik alomatlari aniqlanganligi haqida Operator tomonidan xabardor qilinadi).
5.4.10. Operatordan bunday xabarlarni olgandan so‘ng, har qanday to‘lov operatsiyalarini tasdiqlashda yuqori ehtiyotkorlik va e’tibor ko‘rsatish.
5.4.11. Xizmatga kirish amalga oshiriladigan qurilma yo‘qolganligi yoki uchinchi shaxslar tomonidan nazorat o‘rnatilganligi to‘g‘risida Operatorni darhol, lekin 1 (bir) kundan kechiktirmay xabardor qilish.
5.4.12. Operatorni uning roziligisiz amalga oshirilgan operatsiya fakti aniqlangan paytdan boshlab 1 (bir) kun ichida xabardor qilish.
5.4.13. Dolzarb aloqa ma’lumotlarini taqdim etish va ularning o‘zgarishi haqida Operatorni 3 (uch) kun ichida xabardor qilish.
5.4.14. Operatorning so‘roviga ko‘ra, muayyan operatsiya uning o‘zi tomonidan mustaqil ravishda yoki uning topshirig‘i yoki ixtiyoriy roziligi bilan uchinchi shaxs tomonidan amalga oshirilganligi to‘g‘risida ma’lumot berish, shuningdek firibgarlik holatlari to‘g‘risida ma’lumot taqdim etish.
- SHAXSIY MA’LUMOTLARNING MAXFIYLIGINI TA’MINLASH QOIDALARI
6.1. Foydalanuvchini ro‘yxatdan o‘tkazish va keyinchalik Xizmat orqali to‘lovlarni amalga oshirishda Operator Foydalanuvchining shaxsiy ma’lumotlarini qayta ishlaydi. Bunday ma’lumotlar quyidagilarni o‘z ichiga olishi mumkin, lekin ular bilan cheklanmaydi: bank rekvizitlari, familiya, ism, otasining ismi, pasport ma’lumotlari (yoki ID karta ma’lumotlari), mobil telefon raqami, elektron pochta manzili, qurilma ma’lumotlari, geolokatsiya haqidagi ma’lumotlar, shuningdek, xizmatlarni taqdim etish va qonunchilik talablariga rioya qilish uchun zarur bo‘lgan boshqa ma’lumotlar.
6.2. Shaxsiy ma’lumotlar Foydalanuvchi tomonidan tegishli shakllarga ma’lumot kiritish orqali taqdim etiladi yoki Foydalanuvchining roziligi bilan xizmatdan foydalanish jarayonida avtomatik tarzda uzatiladi.
6.3. Operator Foydalanuvchining shaxsiy ma’lumotlarini uchinchi shaxslarga bermaydi, ushbu Shartnomada, Operatorning shaxsiy ma’lumotlarni himoya qilish va qayta ishlash siyosatida, O‘zbekiston Respublikasi qonunchiligi talablarida (shu jumladan vakolatli davlat organlarining qonuniy so‘rovlarida) nazarda tutilgan hollar bundan mustasno, shuningdek Foydalanuvchining roziligi mavjud bo‘lgan taqdirda.
6.4. Tomonlar Foydalanuvchi ma’lumotlarini, shu jumladan uning shaxsiy ma’lumotlarini ruxsatsiz yoki tasodifiy kirish, yo‘q qilish, o‘zgartirish, bloklash, nusxalash, tarqatish, shuningdek, boshqa noqonuniy harakatlardan himoya qilishga qaratilgan zarur tashkiliy va texnik choralarni ko‘rish majburiyatini oladilar.
6.5. Axborot texnologiyalaridan foydalanishda O‘zbekiston Respublikasi fuqarolarining shaxsga doir ma’lumotlarini yig‘ish, tizimlashtirish va saqlash, shu jumladan ularga Internet tarmog‘i orqali ishlov berish faqat O‘zbekiston Respublikasi hududida jismoniy joylashgan va belgilangan tartibda Shaxsga doir ma’lumotlar bazalarining davlat reyestrida ro‘yxatdan o‘tkazilgan texnik vositalarga joylashtirilgan shaxsga doir ma’lumotlar bazalarida amalga oshiriladi.
- TOMONLARNING JAVOBGARLIGI
7.1. Tomonlar Shartnomani bajarmaganlik yoki lozim darajada bajarmaganlik uchun O‘zbekiston Respublikasi qonunchiligiga muvofiq javobgar bo‘ladilar.
7.2. Foydalanuvchi to‘lovlar yoki o‘tkazmalarni amalga oshirishda ko‘rsatilgan ma’lumotlarning to‘g‘riligi uchun javobgardir. Noto‘g‘ri ma’lumotlar kiritilgan taqdirda, Operator ko‘rilgan zararlar uchun javobgar bo‘lmaydi, hisobdan chiqarilgan mablag‘lar esa qaytarilmaydi, to‘lov tizimlari qoidalarida yoki mablag‘ oluvchi bilan tuzilgan kelishuvda nazarda tutilgan hollar bundan mustasno.
7.3. Foydalanuvchi ishonchsiz qurilmalar yoki ulanishlardan foydalanganda shaxsiy ma’lumotlari va bank kartalari rekvizitlarining saqlanishi uchun javobgardir.
7.4. Operator Foydalanuvchi tomonidan Shartnoma shartlariga yoki Xizmatdan xavfsiz foydalanish bo‘yicha tavsiyalarga rioya qilmaslik oqibatida yuzaga kelgan qoidabuzarliklar uchun javobgar bo‘lmaydi.
7.5. Operator Foydalanuvchining Ofertaga yoki Operatorning takliflariga kiritilgan o‘zgartirishlar bilan o‘z vaqtida tanishmaganligi tufayli yetkazilgan zararlar uchun javobgar bo‘lmaydi.
7.6. Operator Yetkazib beruvchilar tomonidan xizmatlarning sifati, mazmuni yoki ko‘rsatilishi bilan bog‘liq zararlar uchun javobgar emas, chunki Operator to‘lovlarni amalga oshirishda faqat vositachi sifatida ishtirok etadi.
7.7. Operatorning aybi bilan noto‘g‘ri to‘lov yoki o‘tkazma amalga oshirilgan taqdirda, u keyingi ish kunidan kechiktirmay mablag‘larni oluvchiga o‘tkazishi shart. Aks holda, Foydalanuvchi summani qaytarishni va kechiktirilgan har bir kun uchun 0,1 foiz, lekin 10 foizdan ko‘p bo‘lmagan miqdorda penya to‘lashni talab qilish huquqiga ega.
- OFERTANING AMAL QILISH MUDDATI VA UNI BEKOR QILISH
8.1. Shartnoma Aksept paytidan boshlab tuzilgan hisoblanadi va Tomonlardan biri uni bekor qilgunga qadar muddatsiz amal qiladi.
8.2. Foydalanuvchi Servisdagi hisobini mustaqil ravishda o‘chirish orqali Shartnomani o‘z tashabbusi bilan bekor qilish huquqiga ega.
8.3. Operator ushbu Oferta va O‘zbekiston Respublikasi qonunchiligida nazarda tutilgan hollarda va tartibda Shartnomani bir tomonlama suddan tashqari tartibda to‘liq yoki qisman bekor qilish huquqiga ega.
- KELISHMOVCHILIKLARNI KO‘RIB CHIQISH TARTIBI
9.1. Ushbu Shartnoma O‘zbekiston Respublikasi qonunchiligi bilan tartibga solinadi.
9.2. Ushbu Oferta bo‘yicha yoki uni bajarish bilan bog‘liq holda Tomonlar o‘rtasida yuzaga keladigan barcha nizolar va kelishmovchiliklar muzokaralar orqali, nizolarni sudgacha hal qilish (talabnoma yuborish) tartibiga qat’iy rioya qilgan holda hal etilishi shart. Da’voni ko‘rib chiqish muddati u olingan kundan boshlab 10 (o‘n) kalendar kunni tashkil etadi.
9.3. Ko‘rsatilgan muddatda nizoni muzokaralar yo‘li bilan hal qilishning imkoni bo‘lmagan taqdirda, barcha kelishmovchiliklar O‘zbekiston Respublikasi qonunchiligiga muvofiq Operator joylashgan joydagi sud tartibida ko‘rib chiqiladi.
- BOSHQA SHARTLAR
10.1. Ushbu Shartnoma bilan tartibga solinmagan masalalar bo‘yicha Tomonlar O‘zbekiston Respublikasining amaldagi qonun hujjatlari normalarini qo‘llaydilar.
- REKVIZITLAR
«Oxus Pay» AJ
STIR: 311682396
Manzil: 100105, Toshkent shahri, Mirobod tumani, Yangizamon 3-tor ko‘chasi, 1-uy.
IFUT: 62010